កីឡា៖ អ្នកចាត់ការ Mauricio Pochettino បានស្នើសុំទៅកាន់ម្ចាស់ក្លិប Chelsea ឱ្យអត់ធ្មត់ និងផ្តល់ពេលវេលាបន្ថែមទៅកាន់លោកដើម្បីស្តារស្ថានការណ៍របស់ក្លិបតោខៀវឱ្យត្រឡប់ទៅរកស្ថានភាពល្អប្រសើរឡើងវិញ។ គួរឱ្យដឹងថា អ្នកចាត់ការសញ្ជាតិអាហ្សង់ទីនរូបនេះកំពុងស្ថិតក្រោមសម្ពាធយ៉ាងខ្លាំងបន្ទាប់ពីចាញ់ Liverpool ១-០ កាលពីថ្ងៃអាទិត្យក្នុងការប្រកួតវគ្គផ្តាច់ព្រ័ត្រ EFL Cup ស្របពេលបច្ចុប្បន្ន Chelsea កំពុងឈរនៅចំណាត់ថ្នាក់លេខ១១ នៃក្របខណ្ឌ Premier League ហើយឱកាសនៃការប្រជែងកៅអីពានរង្វាន់អឺរ៉ុបក៏ហាក់ខើចទៅៗផងដែរ។

ប្រកួតបន្ទាប់ Chelsea នឹងត្រូវជួបជាមួយក្លិប Leeds United ដែលកំពុងលេងនៅលីគទី២ ក្នុងជុំទី៥ នៃពានរង្វាន់ FA Cup ខណៈជ័យជម្នះទល់នឹង Leeds ដែលកំពុងឡើងជើងទំនងជាអាចបន្ធូរបន្ថយកម្ដៅសម្រាប់កៅអីរបស់លោក Pochettino បាន។ កន្លងមក Chelsea ត្រូវបានគេដឹងថាជាក្លិបចិត្តក្ដៅដោយធ្លាប់បណ្ដេញនូវអ្នកចាត់់ការដែលបរាជ័យក្នុងការឈ្នះពានជូនក្លិបបាននៅរដូវកាលដំបូងរបស់ខ្លួន។ យ៉ាងណាមិញ លោក Pochettino ជឿថា ម្ចាស់ក្លិបនឹងមិនមានចំណាត់ការលឿនបែបនេះទេ។

លោក Pochettino បានប្រាប់អ្នកសារព័ត៌មានកាលពីចុងសប្តាហ៍កន្លងទៅថា៖ "ក្រោយពីបានចំណាយពេលវេលានៅទីនេះ ៨ខែ ខ្ញុំយល់ថាបុគ្គលិក និងកីឡាករនៅទីនេះអាចយល់ចិត្តគ្នាបានយ៉ាងល្អ។ កីឡាករកំពុងយល់ពីអ្វីដែលជារបៀបនៃការធ្វើការងាររួមគ្នា ហើយខ្ញុំជឿថាអ្វីដែលយើងកំពុងធ្វើនេះត្រូវការពេលវេលា"។ លោកបន្តថា៖ "អ្វីដែលយើងទាមទារនៅពេលនេះគឺពេលវេលា និងភាពអត់ធ្មត់ដើម្បីឈ្នះការប្រកួត ហើយយើងត្រូវការការអត់ធ្មត់ពីម្ចាស់ក្លិបដើម្បីសម្រេចវាបាន"៕